仲記唔記得上年我介紹過一隻Rice and corn cake呢? 其實由香港返黎英國之後一直都好努力o甘尋找, 但好多次都失望而回 原因係因為唔見晒D朱古力豆豆味 直到今日同朋友行Supermarket, 終於俾我見到了 佢得返兩大包所以我就買晒兩大包了哈哈 我要慢慢食因為食晒之後唔知要搵幾耐先再搵到佢了

仲有兩個星期我就放Easter了 市面已經出左好多大大盒o既Easter eggs 不過呢我就比較鍾意食相中呢一隻Mini Eggs哈哈 雖然而家市面買到o既Easter Eggs只係o係Easter先推出而相中呢隻就時時都有, 但我就係鍾意佢 其實唔敢成日買因為一食就停唔到口 試過一個鐘入面食晒成包之後我飽左兩日 好甜的一隻朱古力而且食完之後唔飲返大量清水喉嚨唔舒服之餘第二日分分鐘會喉嚨痛加勁出暗瘡 (我食得太多朱古力會出好多暗瘡的 ) 所以為左自己好好多時都control住自己一粒起兩粒止

記得以前細個香港都有得賣呢一隻Mini Eggs的但早幾次返香港都好似唔多覺有, 如果大家o係香港見到, 可以話俾我聽邊到有得賣嗎?

如果要我真係介紹英國o既朱古力餅乾, 我相信我除左會介紹大家十分熟識o既餅乾之外, 我都會介紹呢一隻名為 "Rocky" Caramel味道o既朱古力餅 出面包住一層朱古力, 中間係Caramel之後底部係餅乾 一包多數有六細條, 如果你好彩o既話有時一包會有九條 (Special offer ) 可能因為我好鍾意食Caramel (唔肥唔愛 ) 變左次次去買野食如果見到佢有discount我都會買一包返屋企 由於呢一隻餅其實都幾肥變左我盡量都只會買六條包裝 正所謂 "小吃多滋味" 不過呢如果睇緊呢一篇Entry o既你好愛Caramel而又唔怕肥o既話, 我誠意推介 "Rocky Caramel"

還記得我早排介紹的Drumstick嗎? 之前已經講過話有一隻巨大版的, 今日我終於都見到了 雖然俾我想像中細但其實都已經好大條的了 好友買左四條俾我慢慢食 相信一條都夠我食一日囉哈哈 試過就o甘開大個口睇下可以放到幾多入去, 我個口唔夠大呢哈哈哈 要睇下邊日好日等我開左佢再同大家講呢一條用左我幾耐黎食呀下哈哈哈

"樂天熊仔餅, 好食到唔捨得請" 相信呢一句對大家黎講都唔會陌生吧? "樂天熊仔餅" 呢一句對白真係好準 細細個mammy買一盒要同大佬分, 因為大佬食野不嬲都比我多同埋比我快所以一盒入面我可能只係食左半盒都唔知有冇 之後大個D Daddy就開始買一大盒家庭裝o既, 但因為同一個原因今日盒野先開第二日可能冇左一半或者冇晒 因為 "樂天熊仔餅" o既 "身價" 越黎越貴, 加上入面好似越黎越細包, 屋企人就覺得唔抵食所以就開始唔買 所以即使o係香港都好少買黎食, 買o既都可能只係買一盒食完就算

人地話身在外國對自己屋企成日食到o既野食特別掛住 雖則英國都有China Town變左如果真係o甘掛住都可以去果到食下野又買下野食o甘, 無奈樣樣野都有得賣唯獨 "樂天熊仔餅" 親愛o既Sylvia知道我呢邊買唔到所以當佢由加拿大飛黎英國之前o係加拿大買左一大盒 "樂天熊仔餅" 俾我呢 一大盒入面有細十包, 雖然係有十包o甘多但我只係請左一包俾朋友同一包俾自己房東, 其他o既全部都係自己o既

好似好小家o甘有成十包但只係請得兩個人, 但都係果句 "樂天熊仔餅, 好食到唔捨得請" 話明唔捨得請我又點會請得多人食呢哈哈